The Broken Date lehkhabu thlirna (Burmese)
Lehkhabu hawi zawng: Novel
Ziaktu: Shwe Nga Lay
Chhuah Kum : 2018
Chhut Zat: 500
A man : 2000 ks
Chhuahtu: Daw Tein Gee Win (Rangoon)
He lehkhabu hi bung sawmpakhat a awm a, phek 227-a chhah a ni. A bu chhunga a thawnthu tam zawk innghahna hmun nena inmil takin far thing hmun ngaw-ah thir-sa-kawr leh tlangval khawhar hmel tak mai langte hian a cover design hi chu a fuh thawkhat viau tih a hriat. A lehkhabu that leh that loh erawh a pawn lam landan atang ni lovin, a bu chhunga thu awmte atangin kan thlir dawn a ni.
A thawnthu tlangpui:
He lehkhabu hi nula leh tlangval inhmangaihna chanchin leh thianrual inkawmngeih tak tak te hringnun tarlanna a ni ber a. A changtu nu ber Cherry-I hmangaihna zinkawnga Zaw-a leh Toe Wei-a te hmangaihna-in a hualvel leh neih tuma tan an lak dan chanchin ngaihnawm leh lungchhiatthlak bawk si a ni. Hmangaihna, rinawmna nun nena an chawinungna leh mipat-hmeichhiat(sex) tel miah lova nulat tlangvalna kalpui a nihna hian inngaizawn dan dik zirtirna thawnthu a nihzia a ti chiang hle. 21 century-a thalai ten kan mamawh chu a ni.
Cherry-i te thianrual hi pasarih an ni a, mipa pathum leh hmeichhia pali an ni. Pawl thum an nih atang in hre tanin pawlsawm an nih thleng tumah in phatsan lovin an thianza ho hian an inzui chawt mai thin a. Thian hmangaihna atang nulat tlangval hmangaihna, cherry leh Zaw-a te in karah lo piangin tleirawl mai an la nih avang chuan a ruka suangtuah par tlan chu an tih theih awm chhun a ni. Cherry hi chhungkua pangai tak atanga seilian a ni a, lehkha pawh a thiam thei. A hmel a tha-in a tituai a nalh a, a mizia lah sawisel bo. An khaw nula chhuanvawr leh Doctor nih tuma lehkha zir a nihna chuan in ngaihzawng lam a rilru-ah a awm lo a ni ber mai. Mahse Zaw-a chunga a rilru put dan leh a thian dang te laka rilru put dan chu a in ang lo tih chu an thian dang te pawn an hai bik lo. Pawlsawm result pawh Subject tinah distinction hmu-in a pass. Zaw-a erawh a Pa’n rihsang mual a kaisan hnu khan chhungkua eibar zawnna a ko-ah a thla a, lehkha zirzawm thei lovin a nau inphir te leh amah hmangaih em em tu a Nu tan chhungkua pa ber nih a chang a. Eibar zawnna tha hmuh beiseiin khawpui lam an pem a, lehkha pawh a zir puitlin hman ta lo a nih chu. Hreh hle mah se duhthlang tur dang a nei lo. Valentine’s Day a lo thlen a piangin an khaw hluiah letin Cherry tan thilpek a hawn sak thin. Kum khatah vawikhat chauh in hmuh hun nei mah se an in hmangaihna a dai ngai lo.
Zaw-a awm lo chu remchangah la-in an thian zinga mi Toe Wei-a hian cherry hnenah a hmangaih thu zei tak maiin a lo hrilh ve bawk a. Mi hausa fapa leh zirna lama top-1 ni mah se cherry rilru a hneh thei ngai lo. A rinawm tlat a lawm. Toe Wei-a te chhung hi mi hausa chhungkua an nih mai bakah khawchhung tana mi tangkai leh mitin zah kai chhungkua an ni bawk a, Cherry Nu hian neih tir ngei tumin a fanu chu a hrilh thin. Mandalay lamah lehkha zir chhunzawm a ngaih tak si-ah chuan loh theih lohvin Toe Wei te in-ah atang Cherry hian lehkha a zir chhunzawm a, a rilru pawn Zaw-a hi a phatsan ngai miah lo.
Toe Wei-a nen in nei ngei tura thuthlukna an siam avangin zah pawh dawn lovin Zaw-a in ruk tir a tum a, an awmna khua a pan ta tawp mai a ni. Mahse, thil a danglam zo ta. Zaw-a chu harsatna lian tham tak maiin a lo tlakbuak lai, a nu dawmdawi inah, a nau te pahnih school kal ngai bawk hah pawh sawi thei lo dinhmuna a dinglaia Nupui han neih ringawt chu a theih loh. Anmahni pawh an inchawm thei tawk tawk chauh a ni a, a hmangaih Cherry-i rethei taka hringnun a hmang tur a ngaingam lo a ni ber mai. Lo hnar mai loh chu duhthlang tur dang a awm lo. Theih ni se an hringnun tawi te chu an pahniha chhiar dun an chak ngei mai mahse, a rem tlat lo.
A changtu nu Cherry-I hi a thawnthu lailum luahtu a ni a; a bul atang a tawp thlengin he thawnthuaa mi langsar leh pawimawh ber a ni. A thawnthu boruak thlir chuan Zaa 80 hi lungngaihna-in thla a zar a, Zaa 20 chu hlimna boruak kan tem ve theih chu niin a lang. A changtu pawimawh tak tak pathum an awm. Chung te chu Cherry-i, Zaw-a leh Toe Wei-a te an ni. An pathuma an pawimawhna chu Cherry nunah an pawimawh em em vek mai hi a ni. He lehkhabu-a ka hmuh len deuh chu rinawmna, insumtheihna leh dawhtheihna te a ni. Zaw-a hian a rilru a chang a, Toe Wei’an a taksa. A tawpah a pasal Toe Wei-a hian a chang ve ve dawhtheihna hmangin.
Trinity
Toe Wei’ hi kan sawi tawh angina mi hausa leh thiamna sang tak rap pha a ni a, a nihna hmang hian Cherry hi a nei thei tih chu a ching reng mahse, midang duhthlanna a zah sakna hi a fakawm hle a ni. Hausakna leh thiamna degree chapo pui lo, Toe Wei-a nun hi kan entawn tur chu a ni. Nu leh Pa te hausakna rinchhan lova mahni ke ngeia ding tuma lehkha taima tak a zirna hi tunlai mi hausa fa tamtak hringnun kan en chuan lei leh van ang an ni. Kan hausa a lawm tih vanga lehkha zir tum lohna rilru kan neih hi sim a hun tawh hle.Hmangaihna hi sum nena lei theih a nih lohzia Toe Wei hian a hrechiang tih a hriat. Zirna lamah a taimak vang pawh a ni ang. Zirna tha nei lo se rethei a hmusit ang a, hmeichhia tamtak nun a tihchhiat sak ang a, a hringnun chu a chen hem hem ngei ang mahse, chutiang nun bawlhhlawh chuan a ti buai ve lo. Cherry-i thinglung a hneh theih chhan pawh dawhthei taka a nghah vang a ni.
Cherry-i an thutiamah a rinawm a, vawi te khat pawh a phatsan ngai hek lo. Hmangaihna chu rinawmna nen a enkawla, pawnlam mi a thinlung kawngkhar kik te pawh a chhawn lo, a thinlung chu mipakhat tan chauh a ni. Rosum um duh ni se a tan hun a tam lutuk tlat. A lawina tur chhungkua lah mi tha chhungkua an ni a, an fanu ang chiahin a mamawh engkim an tih sak thin. Mi pakhat hnena a thutiam chu a hre reng a, beisei chuan a khalh kal a ni ber e. Kha a rinawmna kha Toe Wei hian a hmuhhmaih hauh lo. Hetiang khawpa rinawm nula te hi an hlutzia a hrechiang tih a hriat. A rinawmzia Toe Wei’an a hmuh khan a hmangaih tulh tulh zawk a nih hmel. A hmangaih em em nei thei lo mah se amah hmangaih em em tu chunglamin a pe tal a lawm.
Harsatna ruahpui chu huaisen taka hmachhawnin kumkhua-in ruah a sur dawn lo tih chu Zaw-a hian hrechiang a. A tana khuanu ruat chu lawm takin a pawm mai a ni. A rilru natna leh hrehawmna te chuan a hringnun kal mek an tichhia pha ve lo. Tihchhiat a hnekin chakna thahrui a lakna hnarah a hmang ta hlauh hi entawn tlak tak a ni. Cherry nei thei lo mah se a thiltum nih a thulh chuang lo. Hmeichhia thianghlimna a dah pawimawh a, insumtheihna a neihna hian a nunah rah tha tak a chhuah phah ta a nih kha. Cherry hi nei thei lo mah I la vawikhat tal chu ka mutpui a ngai a ti miah lo. Duh ni se Mandalay a zin tum khan a ti deih tawh ang. Insumtheihna ngah tlangval rinawm leh fel hian a thinlung luahkhat tu a chang lo hi a lainatawm mai ni lovin a khawngaih thlak zawk a ni. A rilru natna te chu hmang tangkaiin thu mawi tak tak a phuah a, a naupan laia a nih chak em em, writer rampum huapa milar a ni thei a. Cherry nen inthen lo se tuna a dinhmun hi a thleng kher ang em?
Conclusion
Engpawh chu nise, he thawnthu-ah hian zirtur leh entawn tur tamtak a ziaktu hian min hnuhchhiah a, haichhuah seng a ni lo a, sawisen pawh a ni lo. A changtu pathum nun ringawt pawh hi zirchianna lehkhabu chhuah tham a tling hial ang. Thian in hmangiahna hlutzia pawh sawi a chakawm nen a sei tawh lutuk tlat. An nu leh pa te an fate nunah an inrawlh dan pawh hi ziah lan a chakawm vian nan kan ti tawh lo mai ang. Ziah tham fe a tling. A ziaktu hian lungngaihna leh hlimna, hmangaihna leh dawhtheihna, thianghlimna leh insumtheihna, nulat tlangval in ngaihzawngna thianghlim, thu hlawm tam tak chu phek 227-ah remkhawmin ngaihnawm leh chhiar nuam tak maia a dah thei hia finzia leh thu a thiamzia a lang chiang hle. Burmese writer ho thu thiamzia hi sawi a chakawm viau nan nidanga tih atan kan khek rih ang.
A nih tur ang a nih zawh vek hnu chuan hun rei tak in hmu tawh lo an thian ho te nen chuan an khua hluiah inhmuh khawmna an nei a. Cherry pawn kumthuma Upa fa a pawm tawh a, Doctor thiam tak a ni tawh bawk. An thian dang te pawh sawrkar hna hrang hrang an lo chelh vek tawh. An naupan laia an dream chu tuman an bawhpelh lo. Hmanlai thil te chu theihnghilha, nun thar nena hma lam pan turin an rilru an siam fel a. Hun kal tawh in phuarbeh tir reng chu an duh tawh lo. Hun kal tawha an in hmangiahna chu kalsanin thian hmangaihna zawk chhawmnung zelin hma lama an zinkawng thui tak la awm chu zawh thei turin tawngtaina hmangin an thlah liam ta a ni.
Amah Khawte tlangval-a sawi ang khan ‘thawnthu kan chhiarin a thawnthu laimu leh a phena thu inthup te, a thuchah leh a zirtir zawng zawngte hmu thiam pha vek tur khawpin chhiar tawh thin ang u. Tichuan, a ziaktute leh a chiartute kan hlawk tlang a ni mai’ a tih ang khan thawnthu mai ni lo lekhabu reng reng kan chhiarin a ziaktu chhiar lovin an thuziah phena thu inthup te haichhuak thei zel turin Zophai thalai te hi I harh ang u.
(A kimchanga review a chakawm nen ka Thesis ziah lai chawlhsan theih a nih loh avangin kan chhura buh en thuak thuak ta mai a ni. Pawl-6 ka nih laia Burmese Novel ngaihnawm tak tak ho kha chhiarnawm leh ka nuam. Date-9.7.2020, 1:43 A.M)
Comments