MISSIONARY-TE ṬHIAN

Thuhmahruai

A hmasa berin, Missionary-te țhian tih lehkhabu khawr pum thei tura Lalpan damna, chakna leh thlarau pawltharna kan chang hi kan lawm hle a ni.

1. Ziah Chhan

Mission(Chanchin țha) lam sawi chuan mitin mai hi kan tui em em a. Mahse, tunge sengkhawmhna thawk turin ke rawn pen chhuak ang ti ila, kan mit leh mei kan khup leh zul zul si a. Mahni kal aiin țhenawmte emaw, țhiante emaw tute emaw kal se tih kan rilruah a lo lang nghal a. He lehkhabu kaltlanga veitu nih mai a tawk lova, pen chhuaktu ni ve ngei turin chona leh sawmna tlangau aw a ni.Isua khan, ‘Thu ka pek che u in tih chuan ka țhiante in ni ang,’(John 15:14).

He laia țhian a tih hi Greek țawngbul lamah chuan Philo tih a ni a. He Philo hi hrilhfiah dan hrang a tam a; chung zinga pakhat chauh lo sawi ta ila. Chu chu Zuitu tihna emaw Rinawm tihna a ni awm e. Thuthlung Hlui lamah chuan Pathian chu Missionary hna thawktu a ni a. Thuthlung Thar lamah chuan Lal Isua hi Missionary hna thawktu a ni leh a. Chu missionary hna chu zuitu nihna emaw rinawm tih nan sawifiah a ni a. Chu Zuitu chuan thupek zawm, thuawih leh rinawmna a keng tel a ni. Keini Kawlphai țhalaite hi Pathian/Lal Isua’n a hnung zuitu atan, a thu pek zawm tur leh a tan a rinawm turin min sawm a ni.Missionary-te țhian tih lehkhabu kaltlanga Lal Isua hnungzui tur te, a thu pek zawm tur te, leh rinawm taka atana nung tur a min sawmna hi țhian țha insawmna a ni. Lal Isuan a țhian ni tur a min sawmna chu a hnungzui, thu pek zawm leh rinawm taka nung hi a ni. Lal Isua țhian ni tura sawmna hi Missionary-te țhian lehkhabu ziah chhan a ni.

2. Review Methodology

Positive first positive follow method hman a ni. Pathian chu missionary țha tak a ni a, amah ngei chu thawktu țha nihnain a zui a ni. Pathian mission chu nang leh kei kan ni a. Pathian mithmuhah chuan tute pawh hi kan țha em em a (Gen 1:21). Tin, mihring chu amah angin min siam bawk a, a nunna țawmin mi nung kan lo ni ta a ni (Gen 2:7). Chu pawh chu țha a ti em em a ni. Tuna kan țhat lai hian a rawngbawl tur leh țha taka a rawngbawl tura min sawmna hi chhang ngei turin Krista aia Palai hna chhete rawn thhawhchhuahna mai a ni.

3. Duhkhawp lohna lai

Lehkhabu kan sawi rual ruala mit fukna hmasa ber chu ‘a kawm(Cover)’ hi a ni kan ti thei ang. Țhenkhatten, cover rangnuaih an duh loh laiin, a plain an duh a.

A țhenin, milem a chuan chuan Isua emaw bible milem rawngkai an duh a. Khawvela mi chi hrang awm ta chuan ngaihdan inang lo awm bawk ang chu!. Tin, lehkhabu hming pawh hian mi rilruah hna a thawk bawk a. Ziaktu tam zawk chuan mi lehkhabu hming lo vuah tawh sa an duh ngai lova. Hming dangdai deuh hlek, tawi fel tak, tum kawk leh awmze nei, a bu chhung thu nena inmil turte an thlang fo va.

Missionary-te Țhian lehkhabu hi, a hming ațang rengin a ngaihzawn awm loh khawp mai. A chhan chu a thawktu pawl ni lova, a sawitu leh reltu pawl, sumpai lama ram țang kan tam vang a ni thei awm e.A cover-a Isua Kross pu lai hian khawvel sual zawng zawng phur a. Kalvari tlang zawhna kawnga a mal kal hi, kal puitu a mamawh hle a ni tih hriat nan, a hnung lam cover-ah hian a țhiante nena sengkhawm hna a thawh pui ang a. Keini pawhin, ‘Aw Isu, kross kha kan lo put pui ang che. I ruala sengkhawmna thawk turin i țhianah kan inpe e,’ tihna lam a kawk a ni.Cover colour hi a tak deuh vangin thuziah fiah lo a awm kha printing colour a tak deuh vang a ni a.

Chhiartu te hriatthiamna kan ngen a. Tin, țawngkam țhenkhat ah tri(ț) hi tihhmaih a awm nual bawk a. Tri(ț) aiah ‘m’ tiin a in ziak ang. Chhiartuten chhiar hunah in lo hre dawn nia. Theih tawka siam rem a nih chung pawh a tihsual palh awm hi pawi kan ti a. Chhiartute ngaihnathiamna kan dil a ni. Sel duh apiangten duhsakna vangin sel theih a ni a. A chhe ber thlenga comment pawh kan dawn sawng thei a ni. Chu chuan kan hma lam khawthim chhah tak tawn tlang tura chakna leh khaweng min hmuh tirtu hmanrua a nih dawn avangin, tumah inthlahrung lova faksel turin kan chah bawk a che u.

Lehkhabu siamrem leh thurawn min petute chungah thinlung takin lawmthu kan sawi a ni. Hun chep tak leh buai tak karah, rawngbawlna leh zitirna karah, duhsak taka lehkhabu thlirpui tura kan ngen tlawmte min chhan sak a. Tisa leh thlarau lama kan Professor leh Pastor Senior-te hming meuh a kan lehkhabu thlirna huanga chuai thei lo tur sakhming thailan awm hi kan lehkhabu ti hlutu a ni. Chuti chung chung chuan famkim lo leh inzirlai nihna kawngah, thumal mai ni lovin, thu ziah zawm leh zawm loh thilah pawh a nihna bo silo mahse, grammar lam rem fuh tawk lo a awm nual ang tih kan ring.

Țawngka meuh thua ziahchhuah hian hmasawn kan ngaihna lai leh kan chak lohna min hai langa, chu chuan hmasawn tur leh rahbi thar chuangkai turin chakna min pe tih kan inhre thei a ni.

4. A chhung thu

A chhung thu chungchangah chuan, mi pahnih ziah a nih vangin ziaktu hriat hran theihna leh mimal ngaihdan leh thlirna hran nihna hailan hi kan duh ve a ni. Bible commentaries te leh combine books ah chuan section leh a ziaktu tihhran a ni a. Chutiang zulzui deuh a buatsaih a ni.A chhung thu hi țhen thuma țhen a ni a. Țhenkhatna leh țhenthumna hi Gabriel C. Lalrohlua ziak a ni a. Țhen hnihna hi Lalremruata TL ziak a ni.
Țhenkhatnaah chuan chanchin țha hrilna leh rawngbawlna kalpui dan thlurbing a ni a.Țhenhnihnaah chuan mimal rawngbawlna kaltlanga chanchin țha kalpui dan leh chanchin țha hril kawnga hriattur pawimawhte thlungbing a ni leh a. Țhenthumnaah chuan chanchin țha lam thuchah(sermon) a ni a.

Appendix erawh Bible-a chanchin țha lanna awlsam zawka kan chhiar theihnan a thubelh a ni.

5. Lehkhabu quality

Missionary-te Țhian tih lehkhabu sual chhuak turin, 2019 kum tir ata Pathian hnenah țawngțaiin kan hlan tawh a. Țawngțaina thupui ber chu chhuah theih nan sum mamawh ang hmuh theih nan a ni. Kan țawngțaina chu Lalpan 23(Sunday) February, 2020 –ah a chhanna kan hmu a. Chu pawh kan sen tur hmun thum a țhen a hmun khat pawh kan nei tling lova. Rinna nen Lalpa ram a zauh theihnan tiin kan khawrpum ta hram a ni. Offset pawh kan beisei ngam lova, Pathian ram zauh nan leh a ropui nan te, a țhian kan nih theih nan tiin sawmna tlangau kan au tir ta ringawt a ni.A lehkhabu quality paper emaw offset/press lam aiin a chhiartute tan quality țha, thinlung offset/press lam țha lam hi kan tum ber a ni. A cover emaw, a bu hming emaw, a paper emaw, offset lam emaw a țha thawkhat mai thei. Tin, a bu pawh a zang mahna. Mahse, Missiona lama sawmna aw țha leh fiak, thlarau lam buk rit zawk se tih hi kan țawngțaina hla a ni.

6. Ziaktute chanchin

A ziaktute hi a tak ngei a mission field luhchilh leh ke lo pen tawhte an ni a. Anmahni tawnhriat ngei min fah hi, a bu hlutna pakhat a ni. Tunah hian Tahan Theological College-ah Master of Divinity second leh final year zirlai ni mek an ni. Tv. Lalremruata TL phei chu 2020-2021 Academic Year Student President a ni nghe nghe.
Ziak mi nimah suh se, kan thinlunga Pathian thu, chanchin țha thu tak hmanga Krista țhian ni tura min sawmna thu hi, famkim lo taka auchhuahpui hi kan tum ber a ni. A bul țanna a nih angin chhiarrem ngaihna lai pawh a awm ngei ang.

Lawmthu sawina

Lehkhabu tlang zarh inkhawm tel tura kan sawmna te ngai pawimawha rawn inkhawm zawng zawngte chungah thinlung takin lawmthu kan sawi e. Kan program min hruai saktu Tv. Lal Hming Thang chungah lawmthu kan sawi a, kan hun te Pathian hnena min hlan saktu Tv.Maliana chungah pawh lawmthu kan sawi.

Tin, Zohmun a țanga lo kal vang vang, Tv. Lalzamawia’n (Author of Khawte Tlangval) kan lehkhabu min released sak a. Ani zarah hun hlimawm tak kan hmang thei a kan lawm tak zet a ni. Tin, phal tak a camera thawh leh thla min laksaktu Zodinthara ‘Author of I harh ang u’ chungah kan lawm hle a. Book min review-te Jimmy Ngaih ‘Author of A bin thawk’ chungah kan lawm hle bawk. Zaia min awitute, Lalramneimawia(L.Th-IV) leh Malsawmthluangi(B.Th-IV) chungah kan lawm hle.Thuchah tawi leh min țawngțai saktu Dr. Zohmangaihi chungah pawh thinlung takin lawmthu kan sawi e.

Missionary-te Țhian tih lehkhabu chhiartu a piangte Lalpan a țhian rinawm, zuitu leh thu pek zawm thei turin Thlarau Thianghlim pawl tharna leh tihchakna in chan theihnan malsawm rawh se.Amen.

By Authors