MISSIONARY-TE ṬHIAN (MISSIO-SHIP): Book Review By Jimmy Ngaiha

Lehkhabu Hming – MISSIONARY-TE ṬHIAN (MISSIO-SHIP)

A hun – February 23, 2020 (Sunday – 2 PM)

A hmun – Tahan Theological College Meeting Room

THU-HMA-THEH

Vawiinah kei tehlul, Literature lama tawn hriat pawh la nei lo tak maiin ‘Missionary-te Ṭhian’ tih lehkhabu changtlung leh puithu tak ka han Review ve mai tur hi lawmawm ka tih rualin insit erawh a na duh hle. He lehkhabu buatsaihtu, Gabriel C. Lalrohlua leh Lalremruata TL te hian Book Review tura sawm tur dang an vaih vang a nih chu ka ring hauh lo va, mi tam tak zinga kei kher min ruat ve duhna rilru an pû hi, thiamna leh finna lama mi thliar hranna an neih lohzia a lang chiang hlein ka hria. Chutia mahni koa a tlak tak si-ah chuan ka theih tawpin ka inbuatsaih nghal a, heti hian ziak ngeiin nakin thleng pawha chhiar leh theih turin ka rawn inbuatsaih ve ta rawih mai a ni.

REVIEW METHODOLOGY

Tun ṭuma he lehkhabu ka Review-na tura ka method hman tur chu ‘negative first – positive follows’ tih a ni ang. Mi tam tak chuan mite chanchin kan sawi hian an ṭhatnain bul kan ṭan tlangpui ṭhin a, ‘mahse’ tiin a tawp kan khar zui leh fo. “Lala chu a fel khawp mai; mahse, a thin a chhia,” tih hi mite nun leh thil tih kan sawi zui dan a ni châwk. Tun ṭumah erawh hi chuan, “Lala chu a thin a chhia a; mahse, a fel khawp mai,” tih method hmangin he lehkhabu hi ka rawn Review dawn a, ka duh khawp lohna leh siam rem ngai lai nia ka hriatte ka sawi hmasa phawt dawn a, chumi zawhah chuan faknain kan tlip zui ang.

DUHKHAWP LOHNA LAI

Lehkhabu reng reng kan chhiar hmaa kan en hmasak ber ṭhin chu, a kâwm (Cover) hi a ni tlangpui ṭhin. A kâwmah eng ang thlalak nge awm? tih te, a hnung lamah eng thu nge inziak? tih te, leh a kâwm leh a lehkhabu hming a inmil em? tih te hi kan chĩk hmasak ber ṭhin chu a ni. Chumi tehna zawn aṭanga thlir chuan he lehkhabu hming leh a cover hma lama thlalak an dah – Isuan kraws a pu lai lem hi a inmil lo deuh em? tih min ngaihtuahtir a, a hnung lama Isua leh a zirtirte thlalak ni âwm tak anga lang hi a kâwm hma lamah dah ta se, Isua Kraws pu lai lem hi a hnung lam cover-ah dah zawk thei ta se la, a bu hming nen a inmil zawk viauin ka ring deuh.

A pahnihna atan chuan, he lehkhabu hi mi pahnih inthuruala khawr pum a nih ang hian Column a hranpa ve vea ṭhen lovin, thupui tin hi an pahnih ngeia an ziah dun ni thei se, tih a duhawm hlein ka hria. Chu chuan he lehkhabu hming vuah chhan pawh hi a paw chhuak chiang lehzual theiin a rinawm. Tin, a bu chhung thu ngun taka chhiar hian grammar dik lo a awm nual danah an endik ṭha tawk lo ni ngeiin a lang bawk. Entirnan: Gabriel C. Lalrohluan ama Column enpuitua a rawihte hi Pastor vek an nih bakah Doctorate Degree thleng nei tawh te an ni tih ama ziah ngei, thuhmahruai aṭang kan hmu thei a. Nimahsela, Pastor rual, Doctorate degree neih meuh tawhte endik hnu han thlir hian duhthusamin grammar dikhlel a tam mah mah em aw…? ka ti deuh.

FAKNA LAM

Review-tu han nih takah chuan a ṭhatna lai ngawr ngawr sawi ngawt mai chu, ka review-na lo ngaithlatu mipuiten ‘fak nasa mah mah’ min lo ti ang a, an chhiar duh loh phah hial zawk mai ang tih pawh a hlauh thawnawm rum rum dawna ka hriat avangin ho tê tê anga lang, lian tham lem lo,, dikhlel leh ngaimawh-awm lang tham lo tak tak te ka rawn thur chhuak lui hram a, ka duhkhawp lohna lai sawi tur ka hriat vak loh avangin sawi tur ka ngah êm êm leh sawi ka châak êm êm FAKNA LAM hi ka rawn thlûr bing leh tak tak dawn a ni.

i) ZIAKTUTE

Gabriel C. Lalrohlua leh Lalremruata te hi kan zirlaipuite zingah ro ro pawh mi ‘vantlang chung’ ka ti lo thei lo. A chhan pakhatna chu, tun lai ṭhalai tam tak vei phak loh Mission Rawngbawlna an vei êm êm mai hi keia tan tak phei chuan ‘rinna lama ka ûte’ an ni bik hliah hliah. Chhungrila vei liam mai lova, an veizia a tak ngeiin lehkhabua an rawn pholang thei lehzel hi mi pangngai aia an chungnunzia a lang chiang lehzualin ka hria. Gabriel-a ngat phei hi chu Nepal Mission Field-a Evangelist Missionary-a kum 7 lai rawng lo bawl tawh a nih bakah, lehkhabu pariat lai ziak tawh a ni nghe nghe. Ani hi chu kan ûte rual daih a ni a, zirna leh rawngbawlna lama a Experience-te pawh sawi tham fê a tling hial ang.

Lalremruata pawh hi kum lamah chuan kan naute rual daih mah ni se, ‘a kum ngaihtuahin a naupang na a, mi namai a ni bik lo’ tih a chiang. A thu ziah thupui hrang hrangte han chhiar hian a thlirna a zauvin, Mission rawngbawlna hi vei tak têin a vei hle tih a hriat a. Tahan Theological College-a Student Council President atana an thlan thar ngat a ni hi a thu ziah chhiar hnu chuan mak ka ti ta lêm lo.

ii) A CHHUNG THU

Thupui ṭhen thumah ṭhenin, ṭhen khatna leh ṭhen thumnate hi Gabriel C. Lalrohlua ziah an ni a, ṭhen hnihna hi Lalremruata TL thuziah dah khawm a ni ve thung. He’ng bakah hian thubelh (Appendix) 5 thlengin a awm a, Missionary rawngbawlna kawnga min pui thei tur thu bengvar thlak tak tak te bakah Mission lam kaihhnawih Bible bung leh châng eng emaw zat tarlan a ni bawk. Tichuan, thupui ṭhen khatna aṭanga ṭhen thumna thleng hi phêk 152-a chhah a ni a, Appendix nen chuan phêk 172 laia chhah a ni. He lehkhabu hi phêk 172-a chhah a ni tihna a nih chu. January thlaa Tahan Post thla tin chhuak chanchinbua Dr. J. Khuma an kawmna kha kan chhiar nualin ka ring. Mi thiam, Business Line-a Doctorate Degree meuh la thei khan lehkhabu sawm leh paruk lai a ziak tawh a; mahse, Offset-a tihchhuah a lo nei bik hauh lo mai. A hma thlir an zawha a chhanna pawh, a lehkhabu sawm leh pasarihna tur a buaipui mêk thu leh Offset ngeia tihchhuah a tum tawh thu te a sawi a nih kha. He lehkhabu hi Offset-a her a nih mai bakah, a paper pawh International level tluka ṭha leh zahpuiawm loh a ni tih hi uar takin ka sawi a ni.

A chhunga thupui hlawm hrang hrangte hian rawngbawlna kawnga hma sawn kan ngaihzia leh Kohhranin Mission rawngbawlna kan lak thu tak tawk lohzia min hriat chiantir hle a. Chutih rual chuan, Lal Isua chanchan ṭha hril hna hi kan mawhphurhna leh kan koa tla a ni tih hre thara, harh chhuak turin Kohhranhote min fuih nasa hle. Chu mai bakah, Mission rawngbawlna kawnga harh chhuakten ar khaw thim daia rawng an bawl mai vengthawng ru tak chungin Mission ral rel dan chi hrang hrang fiah leh kimchang takin min fah nghal bawk.

Keini ang paingthar inti ve ting tang si, vanram pawh ‘bel chhunga sa’ tia mi tu emawte sut kuak hnu thlamuang taka lo tawn tlang ve mai mai ṭhin te thlengin Mission rawngbawlna ngaihsak thar leh tura min cho phur thei hi he lehkhabu tihlu zualtu a ni bawkin ka hria.

Ka sawi rei mah mah dawn tlat. In chhiar ve hunah ka sawi tâk te khi a dikzia in hmu lo a nih ngat chuan rilru pe takin in chhiar lo-ah ka ngai ang. Lalpa rawng i rawngbawlna kawnga i silaimu atan he lehkhabu hi lei la, lo chhiar ve teh; bengvarna leh hmasawnnain a lo welcome nghal ang che tih ka chiang ngam sak.

KA LAWM E.

(Jimmy Ngaiha hi 'A Bin Thawk' lehkhabu ziaktu a ni)