POLLYANNA LEHKHABU THLIRNA

Ziaktu: Eleanor H. Porter
Lettu: Evan. Vanlalvena

Hnam dang lehkha letling tur chuan a ti mi, a rau chang a, a ngaihna hria, literature lama mit keu chin, tawng pahnih thiam kawp tha tak, a ziaktu rilru ang pu mi, mi bik nih a ngai. Doctor kutziak damdawi zuarin an chhiar thiam bik riau ang hian, ziakmi “hawrawp” lo man fuh thei riau nih kha a ngai a ni. Saptawng leh Zotawng thiam na zawng tih mi a ni ve lo.

Vanneihthlak takin khawvel miten an ngaihsan rawn novel ropui, dictionary-ah hial an seng luh leh Littleton, New Hampshire’ library tualzawla a lim an din ‘Pollyanna’ lehkhabu chu Evan. Vanlalvena hian Sap tawng thiam lote thal ve theih loh tuikhur ni thin chu Zotawng thiam zawng zawngte tlan theih turin September 2010 daih tawh khan Myanmar Zofate khawpuia an sawi Tahanah ngei min lo chhawpchhuah sak reng mai hi a lo ni a. Chhimbal Magazine neitu leh Myanmar thalai te literature lama hma an sawn theih nana fuih phur thin tu Pu Thantea’n he lehkhabu hi min present a, a chungah ka lawm hle. He lehkhabu hi Bung 24-a then niin phek 155-a chhah a ni bawk. Chipchiar taka thlir a chakawm viau nan thiam zawkte tih atan kan khek ang. Chhura buh thlir angin kan thlir thuak thuak chauh dawn a ni.

A thawnthu tlangpui: Pollyanna-I nu chu a chhungten an duhpui loh pastor pasal a neih luih avangin a chhungte chuan an tuithlar a. Pollyanna pian hnu rei vak lovah a nun a boral san nghal a. Kohhran Nuho chawi tlei niin vanduaithlak takin a pa pawh chuan kum sawm mi a nihin vanram a pan san leh a. Mahse, a pa chuan engkima thil lawmawm hmuh chhuah mai dan leh hriat theih mai dan chu a nunah a lo nemkaiin a lo tuh nghet hman hlauh a ni. Fahrah naupang, vakvai chu khawngaih vang pawh ni chiah lovin, enkawltu tur dang an awm loh vang zawkin, a nu chhungte zinga la dam awm chhun, nula leng rei, hrohrang na, hrawn hrehawm tak mai leh khirh em em bawk si a nutei chuan a enkawl a lo tul ta tlat mai.

A nutei bula a in sawn hnu chuan mi chi hrang hrang thianah siamin a pa zirtir ‘lawmna inhriatsiak zawnga inchai dan’ chu inchaipui turin a sawm thin. He a thil hriat hian rahtha a chhuah a ni ngei ang, vanduaina a tawh tuma kantu a ngah em em dan atang khan a hriat mai. A nutei ngei pawn mak a ti a ni. Pollyanna-I chanchin chuan an khawpum a fanchhuak a. Inchai dan danglam tak mai a hriat chaipui duhtute nunah hlimna a thlen a.He naupang duhawm tak mai hi van atanga Pathian rawn tirh ang mai a ni. ‘Pollyanna-I’ thawnthu hi a letlingtu hian zotawng ngei maia ngaihnawm taka a let thei hi a fakawm hle. A tawpah he thawnthu hi a chhiartu thenkhat chan loh khanah a chhuah a rinawm.

Thawnthu ngaihnawm leh tha ni tur chuan a thawnthu ruhrel hi a pawimawh hmasa ber. Thawnthu ziaktute hian thawnthu ruhrel an din phawt hnuah, a tul angina hmanraw hrang hrang an vawm lut thin a ni. He thawnthu ruhrel hi Organic plot a ni. A chhan chu he thawnthu-ah hian Pollyanna-I nena inhmeh thlapin thil thleng chi hrang hrang pho lan anih vang a ni. He thawnthua thil thleng chi hrang hrangte leh a changtute nun hi bahra ngulzem ang mai hian an inzem chho chiat a.

A tawpah pawh hian a changtuten an chan tur dik tak an chang theuh bawk. A thawnthu ruhrel phenah hian thawnthu peng (sub plot) kan hmu nual a. Pian tawh hnu lama lawmna la tem ngai lo leh hrehawm taka nun hmang thin, mi chi hrang hrang te chu a thawnthu ruangam pangngai atanga peng hla lovin, a thawnthu ruangam nghengin a ziaktu hian a kal tir a. Chung mi chi hrang hrangte chu Pollyanna-I inchai dan an hriat atanga nun danglam ta te an ni bawk. Pollyanna thawntu-ah hian changtu langsar tak kan hmuh te chu Pi Pawli, Nansi, Pollyanna-i, Dr. Chilton-a leh John Pendleton-a te an ni a. An pawimawh dan in ang lo mah se an pawimawh vek a, Pollyanna-i hi a thawnthu khai dingtu ber a ni.

He thawnthuah hian Pollyanna-i vanduaina atawh atang a nutei nun danglam dan te, in ngeih lo kumkhua tur chhungkaw inremna te, mi chi hrang hrang harsatna chinfel a nih thu chenin kan hre thei a. Hei hian nasa takin a thawnthu a ti ngaihnawm phah hle a ni. He planet-a kan awm chhung hi chuan buaina leh lungngaihna tuifawn ten min nuai reng dawn a. Pollyanna-i anga eng ang dinhmunah pawh ding i la, zam mai lo va engkimah hian lawmna tur a awm zel a ni tih hi kan hriata chu lawm theihna kawng chu zawng zel tur kan ni.

Khawvelin Omar Khayyam-a “rubaiyat” a hmelhriat theih nan letlingtu tha Edward FitzGerald a neih a ngai a. Zofate zinga hamlet a lo lenlam theih nan JF Laldailova kan mamawh a, kan kawthlera Suddena, pai fual taka a tuallen theih nan Lalsangliana kan neih a tul a, Sherlock Holmes-a’na kan kaiten a kai theih nan PL Liandinga a lo pian a ngai tlat a ni. Kan thu leh hla-in chang a zauh theih nan letlingtu tha kan mamawh a ni. Keini Myanmar ram ngeiah Zotawng ngeia letlingtu tha Evan. Vanlalvena kan nei hi kan nihlawh hlein ka hria. Hnam dang lehkhabu ril tak tak leh ngaihnawm tak takte hi tun ai hian letling uar zel ila, Mizo literature pawh hian hma a sawn phah ngei ang. Evan. Vanlalvena pawh hian lehkhabu lehlin lam hi ti chhunzawm zel se, a lehlin lehkhabu dang pawh chhiar zel kan duh e.