Film Review: Inthenna Ram thlirna

Khawvel finna leh thiamna lo sang chho zelah hian lemchan dan kalhmang pawh a danglam chho zel a. Tun hma lam chuan lemchanna hmun an nei thin. Grik-ho pawh khan nilenga lemchan entirin mipuite pawh khan nileng lengin lemchan kha an lo en thin a. Rom ho pawhin lemchan rawn uar chhovin lemchanna hmunte pawh an sa a. Mipuiin lemchan kha an hlut em em thin. Europe ram thenkhat, Italy te, Frech-ah te leh England-ah te pawh lemchan hi an uar hle.

Shakespeare-a te hun lai pawhin lemchanna hmun hi tha tak an nei tawh a ni. Mihring finna leh thiamna lo sang zelah miin lemchan chhuahna hmuna lemchan leh chumi hmuna va en ai chuan a film-a chana, chu chu mahni in chhunga en mai hi an duh ta a. Chutiang film-a an chant e chu Cinema Hall-ah an chhuah a, chumi en tur chuan mi an kal dul dul thin (eg. Pu Maunga Hall, Dawng kungfu-a leh Pi Nubawihi). Film puitlinga chhiar tham Mizo film pawh chhiar tham fe kan nei ve ta hi a lawmawm hle a ni. Mahni tawng ngeia mahni hnampuiten an chan film han en hi chu a manhla bik a ni. An tawng kan hriat mang loh film ilo han en te hi chu a hmuhnawm mawh deuh chu a nih hi.

Tun tumah hian Zohmun khaw tlangval Lalbiakzaua Hmar leh a thianten thiam taka an channa film review kan tum a. Fak an ngaih hunah kan fak ang a, sel a tul hunah pawh kan sel dawn a ni. Miten uluk taka an buatsaih lo sawisel hi a inthlahrun awm viau nan anmahni huat vanga sel tur ka nih lo tih hi in hriatthiam ngei ka beisei. A film hi darkar khat chuanga sei niin character hrang hrang hmuh tur a awm bawk. Lemchan thuziah, Photography leh kaihruaitu(director) hi Lalbiakzaua hian a chelh a, editing lam pawh amah tho a nih a rinawm.

Zohmun khua-a in nghat lemchan a nih hmel a, hmangaihna avanga buaina hrang hrang tarlanna a ni ber. ‘Inthenna ram’ tih a nih angin thihna kan hmu tam hle. An thawmhnaw in bel dan enin 1900 chho vel a nih kan ring ve tawp a. An tawngkam hman vel pawh hmanlai tawng an hnaih deuh vek a ni. Hmanlai Mizo bungrua ‘Thul’ kan hmu a, an nundan pawh a la hniam hle tih a hriat a. Zuali leh Thanga te in hmangaih dan kha a rei lo hle a. Kha hun rei lo te chhung khan hmangaihna dik tak an nei thei nghal a nih chuan hmangaihna mak tak a ni ngei ang. Zuali nu pawh a sual thiam narawh. Mi hausa ,a fanu neih tir a tum kha sum a ngainat lam chu thuhran ni se, a fanu a hmangaih vang pawh a ni a. Mahse zuali’n a hmangaih phatsan a tum lo kha tunlai nula te tan entawn tur tha niin ka hria. An in hmangaihnaah hian rinawmna in hmun laili luahin thianghlim taka inngaihzawnna an kalpui thei kha hmangaihna dik chu a ni mai lawm ni?

Inthena ram-ah hian chhungkaw thum kan hmu a; Pi ramtei te nufa, Pu ngaiha te pafa leh Thanga te unau. A behbawmah Zuali thiannu mawii leh samsei tawngfiah lo Liantea te pawh kan hmu a ni. A changtute hian an channa tur theuhah hnehsawh takin an perform thei a, hun chep tak kara buatsaih ni mah se an chang thiam a ni. Thil mak ka tih chu Thanga’n a nau tluangi phuba lak a tum thu zuali a hrilh khan Zuali hian a thlawp a nih hmel a. Chala’n Tluangi a thah thu a pa ngaiha a hrilh hriat khan tualthahna hi thil tha lo leh sual a nih thu mahni fa te zilh ai humhim a tum nghal ringawt khan ‘Kristian zirtirna in’ an nunah nghawng a nei lo a ni ngei ang. Kristian an la ni lo zawk nge?

Mawii’n a thiannu zuali hnena Thanga nau thihthu a hrilh khan a hmelah danglamna a awm hauh lo kha a mak ka ti. Zuali leh Tluangi te chu a tir lam khan in nel deuh angin an lang kha nia. Tluangi thihthu zualin a hriat khan a hmelah lungngaihna hmuh tur a awm lo kha thil danglam tak chu a ni. Thanga te unau khawchhungah pawh awm lova rama an awm chhan nia lang chu an retheih vang a ni a, chuti a nih chuan an awmna khaw dinhmun tur chu a hriat theih mai awm e.

He film-ah mai ni lo Mizo film hrim hrima la ang thei lo ber maia ka hriat chu an inbiakna tawngkam (dialog) hi a ni. Hei hi chu ngaihtuah peih deuh chuan zir nguna thiam mai theih tur pawh a ni nghe nghe. Lem chang tih hriat lutuk taka a changtute an tawng leh tlat thin hian a ti ang thei tlat lo. Mi pahnih chauh khawiilaiah emaw an inkawm a, bengngawng emaw inhau emaw an nih si loh chuan anmahni hriat nuam tawk lek leka ṭawng deuh sap sap awm an nih lai te hian an ri leh ta bawng bawng thin a, a ang lo zo vek zel mai. Stage performance a pawl tlat zel. An aw hi camera-in a record pha lo vang tih hlauhna a len em vang em ni ber ka hre ve hlei lo va. Sap film-ah te hi chuan an han tawng zawih deuh sap laite pawh hi a hriat theih viau zel a, hei hian film a nih min theihnghilh tir hman tlat ṭhin. Hetah hi chuan technical problem kan la nei lian a ni ber ang chu. Hmanraw changkang leh famkim zâwk kan la mamawh ni berin a lang. Kan film siamtute leh a changtute sawisel tumna ni lovin tan kan lâkna tur leh hma kan sâwn zelna tura ngaiahtuahna kan hman theih nan mawlmang takin ka ngaih dan ka rawn sawi ve a ni

Kei chuan hmuhnawm ka tiin vawihnih ka enchhuak hial a. Zohmun khaw nula leh tlangval ho siam a ni tlat lawm. Hmangaihna leh rinawmna pawimawhzia leh rethei te dinhmun hniam zia tarlan an tum ber niin ka hria. Thikna hian mihring nun a tihbuai dan leh tualthahna hial thlen theitu a nihna pawh he film atang hian a lang chiang a ni. Kan sawi hmaih hauh lo tur pakhat chu ‘Android Phone Camera’ nena siam a ni tih hi.

‘Lemchan hi mihring nunphung dik tak tar lanna a nih thin avangin mite kawng dik kawhhmuh nan leh mite nun tihhlim nan a pawimawh hle a ni’